Si Jesukristo Nag-ampo alang sa Iyang Katawhan | 3 Nephi 19:15–36
Si Jesus mibalik ngadto sa Iyang mga disipulo ug ngadto sa mga mituo Kaniya. Iyang gitimbaya si Nephi, gisultihan sila nga mag-ampo kanunay, ug misibog aron mag-ampo ngadto sa Amahan alang kanila. Si Jesus mibalik ug midayeg sa ilang hugot nga pagtuo.
15 Ug nahinabo nga samtang ang mga anghel nangalagad ngadto sa mga tinun-an, tan-awa, si Jesus miabut ug mibarug sa ilang taliwala ug nangalagad ngadto kanila.
Show More
16 Ug nahinabo nga siya namulong ngadto sa pundok sa mga katawhan, ug misugo kanila nga sila mangluhod pag-usab diha sa yuta, ug usab nga ang mga tinun-an kinahanglan moluhod sa yuta.
17 Ug nahinabo nga sa diha nga nakaluhod na silang tanan sa yuta, siya misugo sa iyang mga tinun-an nga sila kinahanglan mag-ampo.
18 Ug tan-awa, sila misugod sa pag-ampo; ug sila nag-ampo ngadto kang Jesus, nagtawag kaniya nga ilang Ginoo ug ilang Dios.
19 Ug nahinabo nga si Jesus mibiya gikan sa ilang taliwala, ug mipahilayo og diyutay gikan kanila ug miyukbo sa iyang kaugalingon ngadto sa yuta, ug siya miingon:
20 Amahan, Ako nagpasalamat kanimo nga ikaw mitugyan sa Espiritu Santo ngadto kanila kinsa Ako mipili; ug kini tungod sa ilang pagtuo kanako nga Ako mipili kanila gikan dinhi niini nga kalibutan.
21 Amahan, Ako mag-ampo kanimo nga ikaw motugyan sa Espiritu Santo ngadto kanilang tanan nga motuo diha sa ilang mga pulong.
22 Amahan, ikaw mihatag kanila sa Espiritu Santo tungod kay sila mituo kanako; ug ikaw nakakita nga sila mituo kanako tungod kay ikaw nakadungog kanila, ug sila nag-ampo ngari kanako; ug sila nag-ampo ngari kanako tungod kay Ako nag-uban kanila.
23 Ug karon Amahan, Ako mag-ampo nganha kanimo alang kanila, ug usab alang niadto kinsa motuo sa ilang mga pulong, nga sila unta motuo kanako, nga Ako unta anaa kanila ingon nga ikaw, Amahan, ania kanako, nga unta kita magkahiusa.
24 Ug nahinabo nga sa diha nga si Jesus sa ingon nag-ampo ngadto sa Amahan, siya miduol ngadto sa iyang mga tinun-an, ug tan-awa, sila mipadayon, sa walay paghunong, sa pag-ampo
