Si Nephi Mipasabot sa Pagpundok sa Israel sa Kataposang mga Adlaw | 1 Nephi 15
Si Nephi nakakita sa gipahiuli nga simbahan pinaagi sa panan-awon sa ulahing mga adlaw. Mibalik siya ngadto sa iyang mga igsoong lalaki kinsa nakiglalis sa propetikanhong mga pagtulon-an sa ilang amahan nga si Lehi. Si Nephi mipasabot sa kahulogan niini gikan sa iyang kaugalingon nga panan-awon.
1 Ug nahinabo nga human ako, si Nephi, nadala pinaagi sa espiritu, ug nakakita sa tanan niini nga mga butang, ako mibalik ngadto sa tolda sa akong amahan.
Show More
2 Ug nahinabo nga ako nakakita sa akong igsoon nga mga lalaki, ug sila naglalis sa usag usa mahitungod sa mga butang diin gipamulong sa akong amahan ngadto kanila.
3 Kay siya sa pagkatinuod namulong sa daghan nga mahinungdanon nga mga butang ngadto kanila, diin malisud nga masabtan, gawas kon ang usa ka tawo kinahanglan mangutana sa Ginoo; ug sila ingon nga tig-a og mga kasingkasing, busa sila wala mosalig ngadto sa Ginoo nga unta mao ang ilang angay nga buhaton.
4 Ug karon ako, si Nephi, naguol tungod sa ka tig-a sa ilang mga kasingkasing, ug usab, tungod sa mga butang diin ako nakakita, ug nasayud nga sila dili gayud kalikayan nga mahinabo tungod sa hilabihan nga kadautan sa mga katawhan.
5 Ug nahinabo nga ako gidaug tungod sa akong mga kasakit, kay ako nagtuo nga ang akong mga kasakit mabug-at labaw sa tanan, tungod sa kalaglagan sa akong mga katawhan, kay ako nakakita sa ilang pagkapukan.
6 Ug nahinabo nga human ako makadawat sa kalig-on ako namulong ngadto sa akong mga igsoon, nagtinguha nga masayud gikan kanila sa hinungdan sa ilang mga panaglalis.
7 Ug sila miingon: Tan-awa, kami dili makasabut sa mga pulong diin gipamulong sa atong amahan mahitungod sa kinaiyanhon nga mga sanga sa kahoy nga oliba, ug usab mahitungod sa mga Hentil.
8 Ug ako miingon ngadto kanila: Nangutana na ba kamo sa Ginoo?
9 Ug sila miingon ngari kanako: Kami wala; kay ang Ginoo wala magtug-an sa ingon nga butang nga mahibaloan ngari kanamo.
10 Tan-awa, ako miingon ngadto kanila: Ngano nga kamo wala maghupot sa mga sugo sa Ginoo?
