IBIGIN ANG KAAWAY? | Homily for 7th Sunday in Ordinary Time (A)

IBIGIN ANG KAAWAY?

Bagaman naniniwala rin naman ang ilang hudyo na dapat na huwag gumanti sa kasamaang ginawa ng iba, tila mahirap naman yata na ang kaaway ay mahalin. Sapagka’t ang pagmamahal ay hindi lang pag-iwas sa pagganti kundi ang paghahangad ng mabuti kahit para sa taong gumawa ng masama sa atin. At hindi pa diyan natatapos ang bilin ni Hesus. Kahit ang mga nag-uusig, nais niyang ipagdasal. Sapaga’t may mga taong mapanakit na kahit ang pagmamahal ay hindi tatanggapin, hangarin na lang nating maranasan nila ang kabutihan ng langit. Ang bilin din ni Hesus, kapag sinampal sa isang pisngi, ibigay pati ang kabila. Hindi man ito literal, ang nais niyang iparating: masamang pagtrato ng iba’y asahan na natin, para ang hangad na maghiganti’y ‘wag nang pansinin.