MAHIRAP O MADALI? | Homily for Second Sunday of Lent (A)

MAHIRAP O MADALI?

Tulad ng mga alagad, nahihirapan tayo at nasasaktan sa pagharap sa katotohanan dahil madalas hindi natin nakikita ang kabuluhan nito sa ating buhay. Hindi natin lubos na nauunawaan kung bakit nga ba kailangan pang pagdaanan ang mga pagdurusang ito. Kaya ang paanyaya sa atin sa Linggong ito, umakyat tayo sa bundok ng Panalangin at doon, maaari nating makita ang isang pagbabagong anyo sa ating pananaw ukol sa mga bagay na nagdudulot sa atin ng sakit at hirap. Hindi tayo aakyat doon para manatili. Hindi kalooban ng Panginoon na takasan na lamang natin ang mga kinakaharap nating sitwasyon na nagdudulot ng pasakit. Ang kalooban niya, panghawakan natin ang kanyang mga salita, na sa bawat pagpapakasakit at kamatayan, mayroong muling pagkabuhay. Kaya hindi tayo dapat matapos sa lumbay o kaya naman sa ilusyon ng ginhawa mabuhay.