Pahinga at Pagpapahalaga | Homily for the 16th Sunday in Ordinary Time (B)

Pahinga at Pagpapahalaga

Ang pamamahinga ay ang pag-uwi sa Kanya. Katulad ng mga alagad na isinugo ni Hesus upang mangaral ng mabuting balita, magpagaling ng mga maysakit at magpalayas ng mga demonyo, dapat lamang na palagi tayong bumalik kay Hesus upang iulat sa kanya ang ating mga gawaing naisakatuparan. Oo, mahalaga naman talaga ang pagsasakatuparan ng ating misyon pero hindi dapat mawaglit ang buhay panalangin. Sa panalangin, nasasabi natin sa Panginoon kung ano ang ating mga karanasan at ang mga nilalaman ng ating puso matapos nating gampanan ang ating misyon. Minsan kasi, nalilibang na tayo sa ating gampanin at nakakalimutan na si Hesus na unang tumawag at nagsugo sa atin. O kaya naman, inaakala natin na ang pagod ay mapapawi rin ng mahabang bakasyon o masarap na pagkain. Ito ang ilan sa mga dahilan kaya tayo napapagod lalo dahil wala nang puwang ang pagbalik kay Hesus sa katahimikan at pakikipag-usap sa kanya sa panalangin.