PAKITANG TAO | Homily for Ash Wednesday (A)

PAKITANG TAO

Ang Kuwaresma ay ang apatnapung araw ng paghahanda sa pag-alala at pagdiriwang sa pagpapakasakit, kamatayan at muling pagkabuhay ng Panginoong Hesukristo. Ang abo na inilalagay sa noo ay tanda ng ating kaabahan bilang mga nilikha mula sa alabok. Ipinapaalala sa atin na wala tayong karapatang magmalaki sa Panginoon dahil utang na loob natin sa kanya ang ating buhay. Ipinapaalala rin sa atin ngayon ang katotohanan ng ating karupukan at hangganan: “Ikaw ay alabok at sa alabok ka rin magbabalik.” Marupok ang ating pagkatao kaya nga nahuhulog din tayo sa kasalanan kaya ang abo ay paalala ng dungis na idinudulot nito sa ating pagkatao at sa ating dignidad bilang mga anak ng Diyos. Kung gayon, mayroon bang dahilan para ang abo sa noo’y ipagyabang? Wala. Ang abo ay tanda na tayo’y nangungutangan lang ng loob sa awa at habag ng Diyos.