REGALO | Homily for the Feast of Saint John the Baptist

REGALO

Kahanga-hanga si Juan Bautista hindi lamang sa kanyang gampanin na pinangatawanan kundi dahil sa kanyang kamalayan tungkol sa kanyang sarili at sa gampaning ito na ipinagkatiwala sa kanya. Maraming pagkakataon na inakala ng iba na siya na ang Mesiyas subalit siya mismo ang nagsabi: “hindi ako ang Cristo; isa lamang akong sugo na mauuna sa kanya…Dapat siyang maitaas at ako nama'y maibaba.” (Juan 3:28,30) Hindi niya kinuha ang pagkakataon na makilala ng mga tao bilang dakila kaysa kay Hesus, bagkus inamin niyang hayagan na hindi siya ang dapat dakilain kahit pa marami siyang tagasunod. Dahil dito, dumating ang pagkakataon na ang ilan sa kanyang mga tagasunod ay sumunod na rin kay Hesus. At hindi ito ikinasama ng kanyang loob. Ganyan ang isang tao na kilala ang sarili, hindi nagmamalaki at nagkukunwari. Alam niya kung ano ang kanyang lugar at tanging gampanin. Tunay siyang nagiging biyaya sa kapwa sapagkat inaakay niya ang mga tao hindi sa kanyang sarili kundi kay Hesus.